Nóvember peysa - fullorðins

Ég er lengi búin að vera með þá hugmynd í kollinum að gera fullorðins peysu með kaðlaprjóni. Út frá þeirri hugmynd spruttu svo aðrar flíkur og teppið í Nóvember línunni sem nú þegar eru komnar uppskriftir að. Ég réðist svo loksins í að gera fullorðins peysuna og er svo sannarlega ánægð með hana. Peysan er prjónuð ofan frá og niður með köðlum, fallegu gatamynstri ásamt perluprjóni. Hún er prjónuð með svokallaðri evrópskri öxl þar sem bakstykki er prjónað fyrst fram og til baka, síðan axlarstykkin og að lokum allt tengt saman í hring. Ermar eru prjónaðar með kaðla – og gatamynstri. Hár kragi prjónaður með perluprjóni. Ég mæli með að lesa yfir uppskriftina í heild áður en þú byrjar.

Stærðir: XS (S) M (L) XL (2XL) 3XL  
Garn: Loch Lomond frá BC garn. Fæst hjá Garn í gangi á Akureyri.
Garnmagn: 300 (300) 350 (350) 400 (400) 450 g. 
Prjónar: 5 mm hringprjónar og sokkaprjónar. 
Prjónfesta: 19/10 (19 lykkjur á 10 cm) með sléttu prjóni á 5 mm prjóna. Athugið að kaðlaprjón skekkir prjónfestu aðeins, prjónfestan með kaðlaprjóni er nær 20/10 og yfirvídd er reiknuð út miðað við það.
Yfirvídd: ca. 102 (109) 113 (116) 121 (129) 139 cm.

Athugið að ég á þessa uppskrift líka í stærð 4XL, með yfirvídd ca. 143 cm, sem hefur ekki verið prufuprjónuð en allar tölur, teikningar og upplýsingar varðandi þá stærð eru yfirfarnar í bak og fyrir og eiga að vera að öllu leyti réttar. Ef þú hefur áhuga á að prjóna þá stærð, endilega sendu mér línu á info.knitsbylinda@gmail.com. 

Allar uppskriftir eru sendar rafrænt (PDF) á uppgefið netfang þegar greiðsla hefur verið framkvæmd. Hægt er að hlaða skjalinu niður 3 sinnum áður en hlekkurinn verður óvirkur. Ég mæli með að vista uppskriftina á góðum stað.